संपर्क क्रमांक : ९५५२५८१४४५, ७३९१९७०४९१
उद्देश व संकल्पना

कागल राम मंदिर

कोल्हापूर जिल्ह्यामधील कागल हे तालुक्याचे मुख्य गाव. गेल्या काही वर्षात पंचतारांकित औद्योगिक वसाहत आणि तेथील बहुराष्ट्रीय कंपन्यांचे कारखाने, अनेक नामवंत शैक्षणिक संस्था, वाढत्या नागरी वसाहती, उद्याने यांमुळे कागल नगरीचा पूर्ण कायापालट झाला आहे. एक छोटे गाव ते एक विकसित शहर असा कागलचा प्रवास होतो आहे. येथे विकसित होत असणार्‍या रमणीय पर्यटन स्थळांमुळे कागलच्या लौकीकत भर पडते आहे.

या वैभवात नुकतीच आणखी एक भर पडली आहे ती येथे नव्याने साकार झालेल्या, शुभ्र 'मकराना' संगमरवरात बांधलेल्या श्रीराम मंदिराची. हे मंदिर साकार झाले ते स्व. राजे विक्रमसिंहजी घाटगे यांच्या संकल्पनेतून. सुंदर वास्तू व शांत, प्रसन्न वातावरण यामुळे श्रीराम भक्तांना तसेच पर्यटकांना हे मंदिर ओढ लावत आहे.

उद्देश व संकल्पना

स्व. राजे विक्रमसिंहजी घाटगे हे सहकार क्षेत्रातील नामांकित व्यक्तिमत्व. आपल्या पारदर्शक आणि सर्वसमावेशक कारभाराने व्यवसायात त्यांनी सर्वांसाठी आदर्श निर्माण केला. आपल्या व्यवसायाच्या मार्फत त्यांनी नेहमीच शेतकर्‍यांच्या हिताला प्राधान्य दिले. शेतकर्‍यांच्या हितासाठी सदैव झटणार्‍या राजे साहेबांनी सामाजिक कार्यात देखील स्वतःला कायमच झोकून दिले.

कागल शहरातील राम मंदिर हे घाटगे घराण्याचे कुलदैवत. या प्राचीन मंदिराची अनेक ठिकाणी पडझड झाली होती. यामुळे या परिसरावर आलेली अवकळा पाहून त्यांचे मन व्यथित होत असे. मंदिराच्या बर्‍याचशा भागाची पडझड झाली असल्याने हे श्रीराम मंदिर पुन्हा नव्याने उभारायचा संकल्प त्यांनी केला.

हा संकल्प पूर्ण करण्यासाठी स्व. राजे विक्रमसिंहजी घाटगे यांनी कसून प्रयत्न केले. एखाद्या कामाला सुरुवात करताना पूर्ण तयारीनिशी आणि त्या विषयाचा सर्वांगीण अभ्यास करूनच काम करावयाचे हा राजे साहेबांच्या स्वभावातील मोठा विशेष गुण. श्रीराम मंदिराविषयी तर त्यांच्या मनात विशेष जिव्हाळा होता. अतिशय विश्वासू आणि समर्पित वृत्तीने काम करणार्‍या लोकांची निवड करून त्यांनी श्रीराम मंदिर जीर्णोद्धार समिती स्थापन केली. मंदिराचे बांधकाम सुसूत्रतेने व्हावे यासाठी स्थापत्य आणि वास्तू शास्त्रातील तज्ज्ञ आणि अनुभवी लोकांचा सल्ला घेतला व त्यांच्याशी मंदिराच्या बांधकामाच्या आराखड्याविषयी सखोल चर्चा केली. समितीचे सदस्य आणि तज्ञ यांच्यासह राजे साहेबांनी दिल्लीतील अक्षरधाम तसेच स्वामी नारायण मंदिर यांसारख्या भव्य वास्तूंना प्रत्यक्ष भेट दिली. या अभ्यासामधून मंदिराचा प्राथमिक आराखडा तयार झाला व त्यानंतर पुढील कामास सुरुवात झाली.

 

आगामी योजना
भव्य स्वरूपामध्ये रामनवमी व नवरात्री उत्सव साजरा करणे
मंदिराचे फ्लोअरिंगचे काम पूर्ण करणे
श्रावण महिन्यामध्ये शिवपुराण, विष्णुपुराण वर्गाचे आयोजन करणे.
अथर्वशीर्ष पठण वर्गाचे आयोजन करणे.
मंदिराचा हॉल सांप्रदायिक, शैक्षणिक तसेच इतर कार्यक्रमासाठी उपलब्ध करून देणे व याविषयी नागरिकांना माहिती करून देणे